കോട്ടക്കൽ പുത്തൂർ അരിച്ചോളിൽ നിയന്ത്രണം വിട്ട ചരക്കുലോറി വാഹനങ്ങളിൽ ഇടിച്ചുണ്ടായ അപകടത്തിൽ മൂന്നാം ക്ലാസ് വിദ്യാർഥി മരിച്ചു.
രണ്ടത്താണി ചെനക്കൽ ചങ്ങരൻ ചോല റീം ഷാനവാസ് (9) ആണ് മരിച്ചത്. അപകടത്തിൽ ഒമ്പതു പേർക്ക് പരിക്കേറ്റു. ഇന്ന് (ബുധൻ) രാവിലെയാണ് അപകടം. പെരിന്തൽമണ്ണ - കോട്ടക്കൽ റോഡിൽ പുത്തൂർ ഇറക്കത്തിൽ ബ്രേക്ക് നഷ്ടപ്പെട്ട ചരക്കുലോറി വാഹനങ്ങളിൽ ഇടിക്കുകയായിരുന്നു.
രണ്ട് സ്കൂട്ടറിലും കാറിലും ഇടിച്ച ലോറി മറ്റൊരു കാറിനെ തൊട്ടടുത്ത താഴ്ചയിലേക്ക് ഇടിച്ചു തെറിപ്പിക്കുകയും ചെയ്തു.
ഉമ്മ സജ്നയ്ക്കൊപ്പം സ്കൂട്ടറിൽ സ്കൂളിലേക്ക് പോവുകയായിരുന്നു റീം ഷാനവാസ്. അപകടത്തിൽ ഗുരുതര പരിക്കേറ്റ കുട്ടിയെ കോട്ടക്കൽ മിംസ് ആശുപത്രിയിൽ പ്രവേശിപ്പിച്ചെങ്കിലും വൈകിട്ടോടെ മരിച്ചു. റോഡരികിലെ ട്രാൻസ്ഫോമറിൽ ഇടിച്ചാണ് ലോറി നിന്നത്. ട്രാൻസ്ഫോമർ പൂർണമായും തകർന്നു. പരിക്കേറ്റവരെ കോട്ടക്കലിലെ സ്വകാര്യ ആശുപത്രിയിൽ പ്രവേശിപ്പിച്ചു.
സുമാന (35), നൈല (5), ആലിയ (7), ഫസീന (41), അജയ് (35), സജ്ന (36), റിഹാൻ (44), ഷഫ്ന (38), സതീഷ് (36) എന്നിവർക്കാണ് പരിക്കേറ്റത്. അപകടത്തെ തുടർന്ന് പ്രദേശത്തെ വൈദ്യുതി പൂർണമായും മുടങ്ങി. പുത്തൂർ പീസ് സ്കൂളിലെ മൂന്നാംക്ലാസ് വിദ്യാർഥിയാണ് റീം ഷാനവാസ്. ബാപ്പ ഷാനവാസ്. സഹോദരങ്ങൾ: റൊണാക് ഷാനവാസ്, റുസ്തം ഷാനവാസ്.