ചാലിശ്ശേരി പെരുമണ്ണൂർ ഇ.പി.എൻ നമ്പീശൻ മാസ്റ്റർ സ്മാരക ചൈതന്യ ലൈബ്രറിയും, ഹരിതം ബുക്സും സംയുക്തമായി സംഘടിപ്പിച്ച ഗ്രാമീണ സാഹിത്യോൽസവം സമാപിച്ചു. ഗാന്ധിസ്മൃതി സദസ്സ്, ആദരസദസ്സ് എന്നിവയും നടന്നു. തദ്ദേശ സ്വയംഭരണ വകുപ്പു മന്ത്രി എം.ബി രാജേഷ് ഉദ്ഘാടനം ചെയ്തു.
നാല് പ്രധാനമന്ത്രിമാരുടെ കാലത്ത് പരമോന്നത നീതിപീഠമായ സുപ്രീം കോടതിയിൽ ഇന്ത്യൻ ഭരണമുഖത്തിൻ്റെ നിയമ മുഖമായ പ്രശസ്തനായ നിയമജ്ഞൻ പാഴൂർ പരമേശ്വരനെ ഡൽഹിയിൽ വച്ചും, ചളവറയിൽ വച്ചും ഏറെ ചെറുപ്പകാലം മുതൽ അറിയാമായിരുന്നതാണ്. എന്നാൽ ഒരു കാര്യം മാത്രം അറിഞ്ഞില്ല. ഇദ്ദേഹം ചാലിശ്ശേരിക്കാരനാണെന്ന് അറിഞ്ഞത് ഈയിടെയാണെന്ന് മന്ത്രി പറഞ്ഞു.
അഡ്വ.പാഴൂർ ദാമോദരൻ, അക്ബർ ആലിക്കര എന്നിവരെ മന്ത്രി ഉപഹാരവും, പൊന്നാടയും അണിയിച്ച് ആദരിച്ചു. ഗ്രാമത്തിലെ മറ്റു എഴുത്തുക്കാർക്കും മന്ത്രി മെമൻ്റോ നൽകി.
തൃത്താല ബ്ലോക്ക് വൈസ് പ്രസിഡൻ്റ് പി.ആർ കുഞ്ഞുണ്ണി അധ്യക്ഷനായി. ലൈബ്രറി കൗൺസിൽ പട്ടാമ്പി താലൂക്ക് സെക്രട്ടറി ടി.സത്യനാഥൻ മാസ്റ്റർ മുഖ്യ പ്രഭാഷണം നടത്തി.
ചാലിശ്ശേരി മേഖലയിലെ മുഴുവൻ എഴുത്തുകാരുടേയും കൂട്ടായ്മ രൂപീകരിച്ചു. കഥയരങ്ങ്, കവിയരങ്ങ്, ഗ്രാമത്തിലെ എഴുത്തുകാരുടെ പുസ്തക പ്രദർശനം എന്നിവയും ഉണ്ടായി.
ചടങ്ങിൽ സംഘാടക സമിതി ചെയർമാൻ ഡോ.ഇ.എൻ. ഉണ്ണികൃഷ്ണൻ, പ്രതാപൻ തായാട്ട്, ഇ.കെ മണികണ്ഠൻ, കെ.കെ പ്രഭാകരൻ, പി.ബി. സുനിൽകുമാർ എന്നിവർ സംസാരിച്ചു. അഡ്വ.പരമേശ്വരൻ നമ്പൂതിരി ജന്മനാട് നൽകിയ ആദരവിന് നന്ദി പറഞ്ഞു.