പരുതൂർ സ്മാർട്ട് വില്ലേജിൻ്റെ ഉദ്ഘാടനവും നാഗലശ്ശേരി വില്ലേജ് ഓഫീസിന്റെ നിർമ്മാണോദ്ഘാടനവും ഇന്ന് നടക്കും. രാവിലെ 11ന് പരുതൂർ വില്ലേജ് ഓഫീസിന്റെ ഉദ്ഘാടനവും നാഗലശ്ശേരി വില്ലേജ് ഓഫീസിൻ്റെ നിർമ്മാണോദ്ഘാടനവും മന്ത്രി കെ.രാജൻ നിർവഹിക്കും. മന്ത്രി എം.ബി രാജേഷ് അധ്യക്ഷനാകും.
പ്ലാൻഫണ്ടിൽ നിന്ന് 50 ലക്ഷം രൂപ വിനിയോഗിച്ചാണ് പരുതൂർ സ്മാർട്ട് വില്ലേജ് ഓഫീസ് നിർമ്മിച്ചത്. ഫ്രണ്ട് ഓഫീസ്, വരാന്ത, വില്ലേജ് ഓഫീസർക്കുള്ള പ്രത്യേക മുറി, ഓഫീസ് സംവിധാനം, റെക്കോർഡ്റൂം, ഡൈനിങ്- മീറ്റിങ് ഹാൾ, ഭിന്നശേഷി സൗഹൃദ ടോയ്ലറ്റ്, പൊതുടോയ്ലറ്റ് തുടങ്ങിയ സൗകര്യങ്ങൾ കെട്ടിടത്തിലുണ്ട്.
സ്കീം ഫോർ സ്പെഷ്യൽ അസിസ്റ്റൻസ് ടു സ്റ്റേറ്റ്സ് ഫോർ ക്യാപ്പിറ്റൽ ഇൻവെസ്റ്റ് ഫണ്ടിൽ നിന്ന് 45 ലക്ഷം രൂപ ചെലവിലാണ് നാഗലശ്ശേരി വില്ലേജ് ഓഫീസ് കെട്ടിടം നിർമ്മിക്കുന്നത്. നിലവിൽ ബ്ലോക്ക് ഓഫീസിന് സമീപത്താണ് വില്ലേജ് ഓഫീസ് പ്രവർത്തിക്കുന്നത്. കൂറ്റനാട് കെ.എസ്.ഇ.ബി സബ്സ്റ്റേഷന് സമീപത്താണ് ആധുനിക സൗകര്യത്തോടെ പുതിയ കെട്ടിടം നിർമ്മിക്കുന്നത്.