കോട്ടക്കൽ പി.എസ്.വി നാട്യസംഘത്തിലെ പ്രധാന ആചാര്യനും പെരിങ്ങോട് കഥകളി പ്രമോഷൻ സൊസൈറ്റിയുടെ രക്ഷാധികാരിയും കളിയരങ്ങിലും സാമൂഹ്യ സാംസ്കാരിക രംഗത്തും നിറഞ്ഞുനിന്ന വ്യക്തിത്വവുമായ കോട്ടക്കൽ ഗോപിനായരെ പെരിങ്ങോട് ഗ്രാമം അനുസ്മരിച്ചു.
കഥകളി പ്രമോഷൻ സൊസൈറ്റിയുടെ ആഭിമുഖ്യത്തിൽ പെരിങ്ങോട് സ്കൂൾ ശതാബ്ദി മന്ദിരത്തിൽ കോട്ടക്കൽ ഗോപി നായരുടെ രണ്ടാം ചരമ വാർഷികത്തിൻ്റെ ഭാഗമായി നടന്ന അനുസ്മരണ സമ്മേളനം, കോട്ടക്കൽ ആര്യവൈദ്യശാല അഡീഷണൽ ചീഫ് ഫിസിഷ്യൻ ഡോക്ടർ കെ.മുരളീധരൻ ഉദ്ഘാടനം ചെയ്തു.
കഥകളി പ്രമോഷൻ സൊസൈറ്റി പ്രസിഡൻ്റ് പി.എം നാരായണൻ നമ്പൂതിരിപ്പാട് അധ്യക്ഷത വഹിച്ചു. ഡോക്ടർ രമേശ് വാരിയർ, ഡോക്ടർ പി. ശ്രീകുമാർ, വി.ടി വാസുദേവൻ, ഞായത്ത് ബാലൻ മാസ്റ്റർ, ശ്രീവൽസൻ തിയ്യാടി, ടി.രാജീവ്, അഡ്വ.പി.എം നീലകണ്ഠൻ, വി.സുരേഷ്, വി.സുധാകരൻ എന്നിവർ സംസാരിച്ചു.
1939ൽ പൂമുള്ളി ശങ്കുണ്ണി നായർക്ക് കീഴിൽ കഥകളി അഭ്യസിച്ച ഗോപി നായർ 1946ൽ പി.എസ്.വി നാട്യസംഘത്തിൽ വിദ്യാർത്ഥിയായും കലാകാരനായും പ്രധാന ആശാനായും പ്രവർത്തിച്ചിരുന്നു. അരനൂറ്റാണ്ടു കാലത്തെ സേവനത്തിനു ശേഷം 1996 ലാണ് വിരമിച്ചത്. കഥകളി ആചാര്യൻ എന്ന നിലയിലും കഥകളി ക്ലബ്ബുകളുടെ പ്രവർത്തനങ്ങളിലും ജീവകാരുണ്യ പ്രവർത്തനങ്ങളിലും അദ്ദേഹം മാതൃകാപരമായ നേതൃസ്ഥാനം വഹിച്ചിരുന്നു.
അനുസ്മരണ സമ്മേളനത്തിനു ശേഷം രാത്രി 7 മണിക്ക് പി.എസ്.വി നാട്യസംഘത്തിൻ്റെ കുചേലവൃത്തം കഥകളിയും അരങ്ങുണർത്തി.
വീഡിയോ റിപ്പോർട്ട് :
https://youtu.be/XhDC95Mfm4o?si=GPRwBQLqhOXbGKK6