നവരാത്രി ആഘോഷങ്ങൾ സമാപിച്ചു: ആദ്യാക്ഷര മധുരം നുകർന്ന് കുരുന്നുകൾ

ചാലിശ്ശേരി മഹാദേവ ക്ഷേത്രത്തിൽ നവരാത്രി പൂജകൾ നടന്നു. ചാലിശ്ശേരി കവുക്കോട് ശ്രീ മഹാദേവ ക്ഷേത്രത്തിൽ ദുർഗ്ഗാഷ്ടമി പൂജയും, വിജയദശമി പൂജയും നടന്നു.

വിജയദശമി ദിനത്തിൽ  വ്യാഴാഴ്ച രാവിലെ ഗണപതി ഹോമം, വിശേഷാൽ പൂജകൾ എന്നിവയും, പുസ്തകങ്ങൾ പൂജയ്ക്ക് വച്ചിരുന്ന പീഠത്തിന് മുന്നിൽ ഗുരു, വേദവ്യാസൻ, സരസ്വതി, ദക്ഷിണാമൂർത്തി, ഗണപതി എന്നിവർക്ക് പത്മമിട്ട് പൂജ നടന്നു. 

തുടർന്ന് എഴുത്തിനിരുത്തൽ ചടങ്ങും ഉണ്ടായി. പ്രദീപ് ചെറുവാശ്ശേരി കുട്ടികൾക്ക് ആദ്യാക്ഷരം കുറിച്ചു. പൂജാദി കർമ്മങ്ങൾക്ക് പാലക്കാട്ടിരി മന ശങ്കരൻ നമ്പൂതിരി, ജയൻ നമ്പൂതിരി, വാസുദേവൻ നമ്പൂതിരി എന്നിവർ നേതൃത്വം നൽകി. പുസ്തകം പൂജയ്ക്കായി വച്ചിരുന്നവർക്ക് കൂട്ടുപ്രസാദവും നൽകി.

നവരാത്രി ആഘോഷത്തിൻ്റെ ഭാഗമായി പട്ടാമ്പി ശ്രീ നെടുങ്ങനാട്ട് മുത്തശ്ശിയാർ കാവിൽ വിദ്യാരംഭവും വാഹന പൂജയും നടന്നു. ക്ഷേത്രം മേൽശാന്തി മാടായി മഠം നാരായണൻ എമ്പ്രാന്തിരി ചടങ്ങുകൾക്ക് മുഖ്യകാർമ്മികത്വം വഹിച്ചു.

പട്ടാമ്പി മുതുതല ശ്രീ മഹാഗണപതി ക്ഷേത്രത്തിൽ വിജയദശമി നാളിൽ മഹാഗണപതി ഹോമം, വിശേഷാൽ പൂജകൾ, പുസ്തക പൂജ, എഴുത്തിനിരുത്തൽ എന്നിവ നടന്നു. ഡോ.മധുസുന്ദരൻ നേതൃത്വം വഹിച്ചു. ക്ഷേത്രം ട്രസ്റ്റിമാർ, എക്സിക്യൂട്ടിവ് ഓഫിസർ തുടങ്ങിയവർ, മറ്റു ഭാരവാഹികൾ എന്നിവർ പങ്കെടുത്തു.