പട്ടാമ്പിയിൽ തുലാ മഴ തിമിർത്തു; പാലക്കാട് ജില്ലാ ശാസ്ത്ര മേളയുടെ പ്രധാന പന്തൽ തകർന്ന് വീണു

പട്ടാമ്പിയിൽ നടന്നു വരുന്ന പാലക്കാട് ജില്ലാ ശാസ്ത്ര മേളയുടെ പ്രധാന പന്തൽ മഴയിൽ തകർന്ന് വീണു. പട്ടാമ്പി ഗവ.ഹയർ സെക്കൻഡറി സ്കൂൾ ​ഗ്രൗണ്ടിലുണ്ടായിരുന്ന പ്രധാന വേദിയുടെ പന്തലാണ് ശക്തമായ  മഴയിൽ തകർന്നു വീണത്. ഇന്ന് വൈകുന്നേരം നാല് മണിയോടെയാണ് സംഭവം. 

ജില്ലാ ശാസ്ത്രമേളയുടെ സമാപന സമ്മേളനം നടക്കുന്നതിന് തൊട്ടുമുമ്പാണ് പന്തൽ തകർന്നത്. സംഭവ സമയത്ത് വേദിയിലും പന്തലിന് താഴെയും വിദ്യാർത്ഥികളും അധ്യാപകരും ഇല്ലാത്തതിനാൽ വലിയ അപകടം ഒഴിവായി. 

ടാർപോളിൻ മേഞ്ഞ പന്തലിന് മുകളിൽ മഴവെള്ളം നിറഞ്ഞതാണ് വീഴാൻ കാരണമായതെന്ന് സംഘാടകർ പറഞ്ഞു. വലിയൊരു വിപത്ത് ഒഴിവായതിൻ്റെ ആശ്വാസത്തിലാണ് എല്ലാവരും.