കോട്ടയം വൈക്കത്ത് കാർ കനാലിലേക്ക് മറിഞ്ഞ് യുവ ഡോക്ടർക്ക് ദാരുണാന്ത്യം. ഒറ്റപ്പാലം സ്വദേശി അമൽ സൂരജ് ആണ് മരിച്ചത്. അമൽ ഓടിച്ച കാർ നിയന്ത്രണം വിട്ട് കനാലിലേക്ക് മറിയുകയായിരുന്നു.
കൊട്ടാരക്കരയിലെ സ്വകാര്യ ആശുപത്രിയിലെ ഡോക്ടറാണ് അമൽ സൂരജ്. ഇന്നലെ കൊട്ടാരക്കരയിൽ നിന്ന് എറണാകുളത്തേക്ക് പോകുന്ന വഴിയിലാണ് അപകടമുണ്ടായത്.
രാത്രി തോട്ടു പാലത്തിനു സമീപത്തു വെച്ചാണ് കാർ കനാലിലേക്ക് മറിഞ്ഞത്. ആളൊഴിഞ്ഞ പ്രദേശമായതിനാൽ അപകടം ഉണ്ടായത് ആരും അറിഞ്ഞില്ല.
ഇന്ന് രാവിലെ നടക്കാൻ എത്തിയവരാണ് തോട്ടിൽ കാർ ഒഴുകി നടക്കുന്നത് കണ്ടത്. തുടർന്ന് പൊലീസിനെയും ഫയർ ഫോഴ്സിനെയും വിവരം അറിയിച്ചു. ഫയർഫോഴ്സ് നടത്തിയ തിരച്ചിലാണ് കാറിനുള്ളിൽ ഡ്രൈവറുടെ മൃതദേഹം കണ്ടത്. ഒറ്റപ്പാലം രജിസ്ത്രേഷൻ നമ്പറുള്ള കാറായിരുന്നു. പോലീസ് നടത്തിയ അന്വേഷണത്തിലാണ്മ രിച്ചത് യുവ ഡോക്ടർ അമൽ സൂരജ് ആണെന്ന് തിരിച്ചറിഞ്ഞത്.
കാറിന്റെ ഡോർ തുറക്കാൻ കഴിയാത്ത അവസ്ഥയിലായിരുന്നു. അമൽ ഉറങ്ങിപ്പോയതാണ് വാഹനത്തിന്റെ നിയന്ത്രണം വിടാൻ കാരണമെന്നാണ് പ്രാഥമിക നിഗമനം.