ആറങ്ങോട്ടുകര പഴയ സത്യൻ ടാക്കീസിന് പരിസരത്തു വച്ച് ഇന്ന് രാവിലെ എട്ടരയോടെയാണ് അപകടം. നിയന്ത്രണം വിട്ട കാർ ഓട്ടോയിലിടിക്കുകയും തെന്നി നീങ്ങിയ ഓട്ടോ തൊട്ടടുത്ത വീടിന് മേൽ ഇടിച്ചു നിൽക്കുകയും ചെയ്തെന്നാണ് ദൃക്സാക്ഷികൾ പറയുന്നത്.
ഓട്ടോയിൽ യാത്ര ചെയ്യുകയായിരുന്ന ദേശമംഗലം വെസ്റ്റ് പല്ലൂർ കല്ലിങ്ങൽ വീട്ടിൽ വിജയകുമാർ (53), മകൻ വിഷ്ണു (23) എന്നിവർക്കും കാർ ഡ്രൈവർക്കും പരിക്കേറ്റു.
ടെക്നീഷ്യന്മാരായ വിജയകുമാറും മകൻ വിഷ്ണുവും ജോലി ആവശ്യാർത്ഥം ദേശമംഗലത്തു നിന്നും എടപ്പാൾ ഭാഗത്തേക്ക് പോകുമ്പോഴാണ് അപകടം. എതിർ ദിശയിൽ നിന്നും വന്ന കാറാണ് അപകടം വരുത്തിവച്ചത്.
ഇടിയുടെ ആഘാതത്തിൽ റോഡ് സൈഡിലുള്ള ശൗര്യം പറമ്പിൽ ഹസ്സൻകുട്ടിയുടെ വീടിന് മുകളിലേക്ക് ഓട്ടോറിക്ഷ വീഴുകയും വീടിൻ്റെ മേൽക്കൂര മേഞ്ഞ ഷീറ്റുകൾ തകരുകയും ചെയ്തിട്ടുണ്ട്.
എറണാംകുളം സ്വദേശിയായ കാർ ഡ്രൈവർ ഉറങ്ങിപ്പോയതാണെന്നാണ് പ്രാഥമിക നിഗമനം. കാറിൽ ഡ്രൈവറെ കൂടാതെ മറ്റാരും ഉണ്ടായിരുന്നില്ല. പരിക്ക് പറ്റിയവരെ ഉടൻ തന്നെ നാട്ടുകാർ തൃശ്ശൂർ സ്വകാര്യ ആശുപത്രിയിൽ പ്രവേശിപ്പിച്ചു.