പ്രവാസി കേരളീയര്ക്കായുളള സമഗ്ര ആരോഗ്യ, അപകട ഇന്ഷുറന്സ് പദ്ധതിയായ നോര്ക്ക കെയറിന്റെ രണ്ടാംഘട്ട എന്റോള്മെന്റിനും പരിഷ്കരിച്ച നോര്ക്ക കെയര് പ്ലസ് പദ്ധതിയിലും ചേരാൻ അവസരം.
2026 മാര്ച്ച് 11 നാണ് പദ്ധതി തുടങ്ങിയത്. ഏപ്രില് 12 വരെ രണ്ടാംഘട്ട എന്റോള്മെന്റിന് അവസരമുണ്ട്. ഈ കാലയളവില് എന്റോള് ചെയ്യുന്നവര്ക്ക് 2026 ഏപ്രിൽ 15 മുതല് ഒരു വര്ഷത്തേയ്ക്കാണ് പോളിസി കാലയളവ്.
നോര്ക്ക കെയര് പ്ലസ്സില് 18 മുതല് 80 വയസ്സു വരെയുളളവര്ക്ക് എന്റോള് ചെയ്യാനാകും. സാധുവായ നോര്ക്ക പ്രവാസി ഐ.ഡിയോ, സ്റ്റുഡന്റ് ഐ.ഡിയോ, എന്.ആര്.കെ ഐ.ഡിയോ ഉളള പ്രവാസി കേരളീയര്ക്കും അവരുടെ കുടുംബാംഗങ്ങള്ക്കുമാണ് പദ്ധതിയില് എന്റോള് ചെയ്യാനാകുക.
നോര്ക്ക കെയര് പദ്ധതി വിപുലീകരിക്കണമെന്നും എന്റോള്മെന്റിന് വീണ്ടും അവസരമൊരുക്കണമെന്നും അഞ്ചാം ലോക കേരള സഭയിലുള്പ്പെടെ പ്രവാസി സമൂഹത്തിൽ നിന്നും ആവശ്യമുയര്ന്നിരുന്നു. ഇതേ തുടര്ന്നാണ് ഒരു മാസം കൂടി എന്റോള്മെന്റിന് അവസരമൊരുങ്ങുന്നത്.
കേരളത്തിലെ 688 ആശുപത്രികള് ഉള്പ്പെടെ രാജ്യത്തെ 20,000 ത്തോളം ആശുപത്രികള് വഴി പ്രവാസി കേരളീയര്ക്ക് ക്യാഷ്ലെസ് ചികിത്സ ഉറപ്പാക്കുന്നതാണ് പദ്ധതി. ക്യാഷ്ലെസ് സൗകര്യമില്ലാത്ത ആശുപത്രികളില് ക്ലെയിം-റീ ഇംബര്സ്മെന്റും ലഭ്യമാണ്.
2025 സെപ്റ്റംബർ 22 മുതല് നവംബര് 30 വരെ സംഘടിപ്പിച്ച നോര്ക്ക കെയര് ആദ്യഘട്ട എന്റോള്മെന്റില് 1,32,000 പ്രവാസി കേരളീയ കുടുംബങ്ങളാണ് എന്റോള് ചെയ്തത്. പദ്ധതിയുടെ ഔദ്യോഗിക ഉദ്ഘാടനം 2025 സെപ്റ്റംബര് 22ന് മുഖ്യമന്ത്രി പിണറായി വിജയനാണ് നിര്വ്വഹിച്ചത്.