ഹയർ സെക്കൻഡറി പ്ലസ് വൺ പ്രവേശനത്തിന് മെറിറ്റ് ക്വാട്ടയിലെ വിവിധ അലോട്ട്മെന്റുകളിൽ അപേക്ഷിച്ചിട്ടും നാളിതുവരെ അലോട്ട്മെന്റ് ലഭിക്കാത്തവർക്ക്/ നിലവിൽ പ്രവേശനം ഇല്ലാത്തവർക്ക് നിലവിലുള്ള വേക്കൻസിയിൽ പ്രവേശനം നേടുന്നതിനായി ആഗസ്റ്റ് 13ന് വൈകിട്ട് 4 വരെ അപേക്ഷ സമർപ്പിക്കാം.
എന്നാൽ നിലവിൽ ഏതെങ്കിലും ക്വാട്ടയിൽ പ്രവേശനം നേടിക്കഴിഞ്ഞ വിദ്യാർഥികൾക്ക് അപേക്ഷിക്കാൻ സാധിക്കില്ല.
നാളിതുവരെ അപേക്ഷിക്കുവാൻ കഴിയാത്തവർക്കും അപേക്ഷ സമർപ്പിക്കാം. നിലവിലുള്ള വേക്കൻസി www.hscap.kerala.gov.in ൽ ആഗസ്റ്റ് 12 ന് രാവിലെ 9 ന് പ്രസിദ്ധീകരിക്കും. പ്രസ്തുത വേക്കൻസിയിൽ പ്രവേശനം നേടാൻ ആഗ്രഹിക്കുന്നവർ ആഗസ്റ്റ് 12 ന് രാവിലെ 10 മണി മുതൽ 13 ന് വൈകിട്ട് 4 മണി വരെയുള്ള സമയപരിധിക്കുള്ളിൽ കാൻഡിഡേറ്റ് ലോഗിനിലെ Apply for Vacant Seats എന്ന ലിങ്കിലൂടെ അപേക്ഷ സമർപ്പിക്കണം.
ഇതുവരെയും അപേക്ഷ നൽകാൻ കഴിയാത്തവർ വെബ്സൈറ്റിലെ പ്രവേശനത്തിന്റെ തുടർ പ്രവർത്തനങ്ങൾക്കായി കാൻഡിഡേറ്റ് ലോഗിനും 'Create Candidate Login-SWS' എന്ന ലിങ്കിലൂടെ രൂപീകരിക്കണം.
തുടർന്ന് കാൻഡിഡേറ്റ് ലോഗിനിലെ 'Apply for Vacant Seats' എന്ന ലിങ്കിലൂടെ പ്രസിദ്ധപ്പെടുത്തുന്ന വേക്കൻസികൾക്കനുസൃതമായി ഓപ്ഷനുകളും നൽകി അപേക്ഷ അന്തിമമായി സമർപ്പിക്കണം.
അപേക്ഷയിൽ പ്രസിദ്ധപ്പെടുത്തിയ വേക്കൻസികൾക്കനുസൃതമായി എത്ര സ്കൂൾ/ കോഴ്സുകൾ വേണമെങ്കിലും ഓപ്ഷനായി ഉൾപ്പെടുത്താം. വിവിധ കാരണങ്ങളാൽ ഓൺലൈൻ അപേക്ഷ സമർപ്പിക്കുവാൻ കഴിയുന്നില്ലായെന്നും ഹയർ സെക്കണ്ടറി പ്രവേശനത്തിന് അപേക്ഷിക്കുവാൻ അവസരം നൽകണമെന്നും ആവശ്യപ്പെട്ട് പൊതുവിദ്യാഭ്യാസ ഡയറക്ടർക്ക് അപേക്ഷകൾ സമർപ്പിച്ചിട്ടുള്ളവർക്കും ഈ അവസരത്തിൽ അപേക്ഷ ഓൺലൈനായി നൽകാം.
പട്ടികവർഗ വികസന വകുപ്പിനു കീഴിൽ പ്രവർത്തിക്കുന്ന 15 മോഡൽ റെസിഡൻഷ്യൽ ഹയർ സെക്കണ്ടറി സ്കൂളുകളിലേയും പട്ടികജാതി വികസന വകുപ്പിന്റെ കീഴിലുള്ള ആറ് മോഡൽ റെസിഡൻഷ്യൽ ഹയർ സെക്കണ്ടറി സ്കൂളുകളിലേയും പ്രവേശനം ഏകജാലക സംവിധാനത്തിൽ പ്രത്യേക അപേക്ഷകൾ ക്ഷണിച്ച് മുഖ്യഘട്ടത്തിലെ മൂന്ന് അലോട്ട്മെന്റുകളും രണ്ട് സപ്ലിമെന്ററി അലോട്ട്മെന്റുകളും പൂർത്തീകരിച്ച ശേഷമുള്ള ഒഴിവുകളും വെബ്സൈറ്റിൽ സ്പോട്ട് അഡ്മിഷനായി ആഗസ്ത് 12 ന് രാവിലെ 9 ന് പ്രസിദ്ധീകരിക്കും. യോഗ്യരായ അപേക്ഷകർക്ക് പ്രസ്തുത ഒഴിവുകളിലേയ്ക്ക് അപേക്ഷിക്കുന്നതിനുള്ള നിർദേശവും വെബ്സൈറ്റിൽ പ്രസിദ്ധീകരിച്ചിട്ടുണ്ട്.