പട്ടാമ്പിയെ വൈജ്ഞാനിക നിയമസഭാ മണ്ഡലമാക്കി മാറ്റുന്നതിനുള്ള പദ്ധതി തയ്യാറാക്കാൻ തിരുവനന്തപുരം എഞ്ചിനീയറിംഗ് കോളേജിൽ (സി.ഇ.ടി) നിന്ന് വിദഗ്ധ സംഘമെത്തി. മുഹമ്മദ് മുഹ്സിൻ എം.എൽ.എ യുടെ ക്ഷണമനുസരിച്ചാണ് വിദഗ്ദ സംഘം എത്തിയത്.
മുമ്പ് കില (കേരള ഇൻസ്റ്റ്യൂട്ട് ഓഫ് ലോക്കൽ അഡ്മിനിസ്ട്രേഷൻ) സംഘമെത്തുകയും വിവിധങ്ങളായ പദ്ധതികൾ ആവിഷ്കരിക്കുകയും ചെയ്തിരുന്നു. കൂടാതെ കോഴിക്കോട് എൻ.ഐ.ടി (നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജി) സംഘവും പട്ടാമ്പിയിലെത്തി വിദ്യാർത്ഥികളും അധ്യാപകരുടെയും നേതൃത്വത്തിൽ നിരവധി പദ്ധതികൾ നടപ്പിലാക്കുന്നത് പഠനവിധേയമാക്കിയിരുന്നു.
പട്ടാമ്പിയുടെ ഭാവി മുന്നിൽക്കണ്ടുള്ള നഗര വികസനം, പശ്ചാത്തല സൗകര്യങ്ങൾ, കണക്ടിവിറ്റി, സോഷ്യൽ ഇൻഫ്രാസ്ട്രക്ചർ, വിവിധതരം സമൂഹങ്ങളുടെ വികസന ആവശ്യങ്ങൾക്കുള്ള പദ്ധതികൾ തുടങ്ങിയവ പഠന വിധേയമാക്കാനും ദീർഘകാല അടിസ്ഥാനത്തിൽ നടപ്പിലാക്കാനുള്ള പഠനമാണ് സംഘം നടത്തുക. ഇതുവഴി സംഘത്തിന്റെ പ്രധാനപ്പെട്ട ലക്ഷ്യം പട്ടാമ്പി മണ്ഡലത്തെ ഇന്ത്യയിലെ ആദ്യത്തെ വൈജ്ഞാനിക മണ്ഡലം ആക്കി ഉയർത്തുന്നതിന് സാമൂഹിക വികസന പശ്ചാത്തല സൗകര്യങ്ങളും സംവിധാനങ്ങളും ഒരുക്കുന്നതിനുള്ള പദ്ധതികൾ നിർദ്ദേശിക്കുക എന്നതാണ്.
പട്ടാമ്പി മണ്ഡലത്തിൽ ആയിരം കോടി രൂപയുടെ പദ്ധതികൾ ലഭ്യമാക്കുകയും വ്യക്തമായ ഡിസൈനോടെ മുന്നോട്ടു പോകുന്നതിനുള്ള പഠനം നടത്തുകയുമാണ് ലക്ഷ്യം. പ്രാഥമിക റിപ്പോർട്ട് ലഭിക്കുന്നതോടെ പട്ടാമ്പിയെ ഇന്ത്യയിലെ പ്രഥമ വൈജ്ഞാനിക മണ്ഡലമാക്കി ഉയർത്തുന്നതിന് നടപടി തുടങ്ങും.